مين قال يا جماعة إن الاخوان دول متزمتين؟

مين قال يا جماعة إن الاخوان دول متزمتين؟..... بالعكس دول ناس فرى خالص مالص.....يعنى كلام فارغ اللى يقولك انهم- لو وصلوا لحكم مصر- هيقفلوا السينمات و المسارح و يولعوا فى افلام عادل إمام و كتب إحسان عبد القدوس..هذا بالاضافة للعديد من المهام التى من المتوقع منهم القيام بها من أمثلة...سلخ يوسف شاهين و تحدى امريكا بتهور و هدم التماثيل و الهرم الاكبر و الجهاد لتحرير العراق و افغانستان و تطفيش نصف الاقباط من البلد و اخذ الجزية من النصف الاخر و إغلاق الشواطىء و جلب السياح لأسلمتهم و فرض الحجاب بالعافية و اعتقال روبى بمؤخرتها و بتر الاصبع الوسطى بتاع إبراهيم سعيد و متظاهري الحزب الوطنى و تحويل الراقصات إلى ملك يمينهم و قتل المرتدين و قطع السجاير و تحريم المزدكول إلا إن كان عندك عذر (يعنى اخر نص جنيه رصيد)..... .ابدا ابدا يا جماعة ديه سوداوية منكم لو افتكرتوا كده.....
ففى عهد الاخوان
ممكن تسمع الاغنية الرومانسية ديه..... (بحبك و بموت فيكى ....يا مراتى....خدينى فى حضنك....يامراتى.....هاتى بوسة....يا مراتى).........للمطرب محمد بن ثروت...
و ممكن تشوف الفيلم الرومانسى ده..... (الحب الحقيقى........حبك لدينك) تدور احداث الفيلم عن شاب يعيش فى العهد البائد فيحب فتاة – محجبة طبعا – اسمها الحاجة زهرة..وتتطور الاحداث ليكتشف فى النهاية انها رجل مخابرات متنكر فى مهمة اخوانية فيترك -الشاب – حياته العابثة و يحرق كل اغانى الحب و يتجه للدين.....
و ممكن تقرا كتاب... (نعم للحور العين....لا لنساء الارض) للكاتب الاخوانى المعروف سمير رجب –ايوة هو و انتوا عارفين طبعا – و مع الكتاب ملحق هدية دليلك للعجز الجنسى...........
وممكن كمان تقرا جريدة معارضة شعارها هو (الاسلام هو الصح )...و قد تجد فيها الخبر ده...... (مازالت بلطجية الاخوان تحكم البلد بالقوة و تترك النساء تسير فقط بالحجاب و كأنهم نسوا وجود نقاب و المصيبة كمان ان الرجال حليقى الذقون...اللهم اهلك القوم الظالمين)
و سيظهر حزب معارض اسمه (الاسلام ده دين مية مية)
و سيتمتع الشعب المصرى بديمقراطية كاملة تحت مظلة حكم الاخوان لدرجة ظهور حركات معارضة مثل حركة (الإسلام ده دين كدة .....مع شعارها المعروف رفع الابهام) .......
و هتلاقى تغيير فى اقوال عادتنا و تقاليدنا...يعنى مثلا..عيد مبارك هتتحول الى عيد عاكف علينا كلنا ... و الف مبروك هتبقى الف معكوف...و الاسم الحقيقى لرئيس وزراء اسرائيل الاسبق مش ايهود باراك..لأ...ده ايهود عاكاف....... ..
ملحوظة.....هل الدكتور الاخوانى المحترم عصام العريان هيتم عزله من الجماعة بعد كدة لأن اسمه عورة؟؟!
فى النهاية احب اهدى للناس اغنية ايهاب توفيق مع بعض التذويق.... (اشمعنى يا شعبى اخترت ده اشمعنى هو...اشمعنى بعد الخرس ده صوت بقوة....و حياتك عندى لأسيبك انت و بختك و نصيبك انت اللى اخترته حبيبك متجيش تقولى ده عمل و سوى!!)
اخر كلام عندما ترى مشاجرة عنيفة بين شخصين بالتأكيد تتمنى ان تنفض الخناقة و يأتى الناس لفصلهم و صلحهم حتى لا تتطور الامور...لكن هناك جزء عند اى انسان قد يكون ضعيف عند البعض و قوى عند الاخر هو ان تستمر المشاجرة حتى يرى الدم و التلاحم على اشده......هذا الجزء عندى يطالب بحكم الاخوان لمصر................